Uztailaren 12tik 16ra bitartean, Ttakunbiraren 10. edizioa burutuko du Hutsun txalaparta talde nafarrak. Elizondon hasiko dira, eta Hernanin bukatuko dute ibilaldia, hilaren 16an. Helburua da txalaparta Euskal Herriko txoko eta herrietara eramatea eta, txirrindularitza zaletuak direnez, ibilaldia bizikleta gainean egiten dute, txalaparta gainean eramaten dutelarik.
Uztailaren 16an Hernanin amaituko dute Ttakunbira, ekitaldi berezi batekin: Zuaznabar, Zabalegi eta Goikoetxea txalapartarien baserrietan, edo hauek egon ziren lekuetan, geldialdiak egingo dituzte eta joaldiak eskainiko dituzte, omenaldi modura. Ttakunbirakoek oraindik ez dakite zehazki zein ordutan helduko diren Hernanira, baina aurreratu dute, arratsaldeko 17:00etatik 20:00etara bitartean izango direla geldialdiak.
60 bat kilometro egunero
Egunero, 50 edo 60 kilometro inguru egingo dituzte. Beraz, guztira, 250 edo 300 kilometroko martxa osatuko dute aurtengo edizioan. Aurtengo zirkuitua batez ere Lapurdin barrena egingo dute eta handik jaistean Hernanin amaituko dute egitasmoa. k