LGTBIQ+ Harrotasunaren Nazioarteko Eguna da gaurkoa, eta hori ospatu eta aldarrikatzeko, Lasarte-Orian egingo dute eskualde mailako mobilizazioa. Buruntzaldeko Transmaribibollo Kolektiboak deituta, manifestazioa egingo dute, iluntzeko 20:00etan Okendo plazatik abiatuta. Loratuz Lotu elkarteak herritar guztiei luzatu die bertaratzeko deia.
«'Hemen gaude' leloarekin agertu ginen, orain hiru urte. Hemen gaude heteroarauaren disidentzia guztiak, baina ez espero gaituzten moduan. Hemen gaude zisheteropatriarkatuari, heteroauari, transmaribollofobiari, patologizazioari eta askotariko biolentziei 'nahikoa da' esanez. 'Hemen gauzkazue eta hemen aurrean izango gaituzue' esaten dugu», adierazi du Transmaribibollo Kolektiboak.
Azken aldian indartutako gorroto diskurtsoak eta eraso homofoboak ere salatuko dituzte gaurko manifestazioan: «Ez gara isilduko».