Egun lasaiagoa izan zen atzokoa San Joanetan, belarriak zorroztu eta mota guztietako musikaz gozatzekoa: Musika Bandaren eta txistularien emanaldiak, danbor hotsak, Lua Matheusen doinu brasildarrak... Gauean hasi zen zalaparta, Puro Relajok denak dantzan jarri ondoren; eta segida izango du gaurkoan, goizean goizetik. Maxkuri kolpeen hots bereziak hartuko dio erreleboa, atzoko doinu sortari.
Izan ere, gaur 'oparituko' dizkie Axeri Dantzak aurreneko bizkarreko eta ipurdikoak herritarrei. Berezia izango da gaurko hitzordua haientzat: Axeri Dantza hasi aurretik, Jon Iraola Eceiza ekarriko dute gogora, urte luzez sokan aritutakoa eta Axeri Dantzan laguntzen ibili zena. Bertan izango dira haren senideak, eta dantza eta lore sorta eskainiko dizkie axeriak.
Axeri Dantzaren ondoren, buruhaundien eskutik jarraituko dute bizkarrekoek, bigarrenez aterako baita kalera erraldoi eta buruhaundien konpartsa; oraingoan, eguraldi ederrarekin eta kale buelta osoa egiteko gogoz.
Eta eguerdiko 13:00etan, koadrilaka elkartuko dira herritarrak Plazan, brindisa egiteko. Aurtengoan, Betikoak koadrila izango da omendua.
Arratsaldean eta gauean, berriz, musika eta esku pelota izango dira protagonista.
