Gaur arratsaldean jokatuko da, beste behin, Hernaniko Solteko Dantza Txapelketa. Oraingoan, zazpi bikote ariko dira Plazako taula gainean dantzan, arratsaldeko 17:30etan hasita: Alaia Amubieta eta Amets Amubieta azpeitiarrak; Maren Galvez lezotarra eta Gorka Granado sopelarra; Malen Arrizabalaga eta Enaitz Segurola azpeitiarrak; Laura Bastida eta Ekain Uzkudun azpeitiarrak; Leire Urrestilla eta Iker Urrestilla zestoarrak; Katerin Artola oiartzuarra eta Iker Belintxon lezotarra; eta Jone Arriaran eta German Aranburu azpeitiarrak.
Epaimahaia, berriz, hiru kidek osatuko dute, Gipuzkoako Dantzarien Biltzarrak izendatuta: Karlos Sarriegi hernaniarrak, Estela Atorrasagasti oriotarrak eta Xabier Mendizabal donostiarrak.
Bikote bakoitzak dantzatuko beharko ditu zortzi pausoko fandangoa eta arin-arina, eta bikoteen aurkezpen saioa ere puntuagarria izango da. Erritmoa markatuko diete Hernaniko Herri Musika Elkarteko txistulariek, eta Eider Garro eta Araitz Elizalde trikitilariek.
Bikote partehartzaile guztiek jasoko dute diru-saria. Irabazleek txapelak, trofeoak eta 300 euroko saria jasoko dute. Bigarren bikoteak, berriz, trofeoak eta 250 euroko diru-saria. Hirugarrenak trofeoak eta 220 euro; eta laugarrenak trofeoak eta 200 euro. Gainerako bikoteek, berriz, 140 euroko saria jasoko dute.