Atzo gaueko danbor hotsei, gaur goizean emango diete segida, Kaxkoko kaleetan. Santa Barbarako helduek jarri zituzten danborrak dantzan atzokoan, eta haurrak izango dira protagonista gaurkoan, bi elkarteetakoek bat eginda: Etxeberrikoek eta Santa Barbarakoek.
Auzoko Mendekoste Jaietan egin zuten aurreneko saioa Etxeberriko danborradako kideek, kale buelta jendetsuarekin; eta Hernaniko erdigunera gerturatuko dira gaurkoan, Santa Barbarakoekin bat egin eta kaleak alaitzeko, San Joan egunez, txarangak lagunduta. Dozenaka haur elkartuko dira, uniforme bereziekin jantzita: danborjoleak, zuzendariak, kantinerak, sukaldariak...