Atsegindegin, Plazan, Zinkoenean zein Plaza Berrin, izango da saltsarik San Joanetako gauetan. Baina ilundu ondorengo festarako mugarririk bada, Tilosetako txosna gunea izango da askorentzat, beste behin. Sei txosna jarri dituzte aurten, joan den urtean baino bat gutxiago: Bilgune Feministarena, Boltaiarena, Ernairen Gazte Txosna, Gazte Asanbladarena, Mugimendu Sozialistarena, eta aurtengo nobedadea, 'Denok etxera' txosna, preso ohiek jarri dutena.
Atzo bertan zabaldu zituzten txosnak, aurtengoan parrandak aurrea hartu baitio jaien hasierari. Larunbata izanik, herritar askok ez zuten aukera galduko jaien txupinazora 'pozik' (edo ohetik ezin altxa) iristeko, eta hori horrela, atzo arratsaldeko 19:00etan inauguratu zuten txosna gunea ere.
Txosna bakoitzak izango ditu bere berezitasunak, eta baita kontzertu, ekintza eta emanaldiak ere. Bilgune Feministak bi egunez egingo du tonbola aurten, gaur eta bihar; playbacka prestatu du astearte gauerako; eta Mojito Gaua izango da asteazkenekoa, Batukada Feministaren ondoren.
Boltaiaren txosnan, berriz, egunero izango dira kontzertuak, 23:00etatik aurrera. Magnolia (DJ Donostia) ariko da gaurkoan, eta herriko taldeen gaua izango da biharkoa: Boody Blotherhood, Khymaira eta Biersbreakers. Eira eta Beñaranks taldeekin girotuko dute astearteko gaua, eta Nokonok eta Samuk alaituko dute asteazkenekoa.
Kontzertuak izango dira beste bi txosnatan ere. Ernairen Gazte Txosnan, Ziztada & Rlantz rap eta reggae taldea ariko da gaur, eta Zuriketan eta DJ Pintxatxapote asteazkenean. Gazte Asanbladaren txosnan, berriz, Trintxerak, Labankadak eta DJ Triokak girotuko dute biharko gaua, eta Komerik eta Kaparrak taldeek etzikoa.
Mugimendu Sozialistaren txosnan, bere aldetik, bertso saioa prestatu dute bihar iluntzerako: Aitor Bizkarra, Aroa Arrizubieta eta Andoni Rekondo ariko dira kantuan.
Eta 'Denok Etxera' txosnan, jatekoa izango da berezitasuna: pizzak jarriko dituzte aukeran, iluntzeko 20:00etatik aurrera.
|
'DENOK ETXERA' TXOSNA Pizzak aukeran egunero, iluntzeko 20:00etatik aurrera: Xanti, 4 gasna, Nahia eta Barazkia (Lapurdiko Pizzak), 12 euroan |
|
GAZTE ASANBLADAREN TXOSNA Bihar, Kontzertuak, 23:00etatik aurrera: Trintxera, Labankada eta DJ Trioka Etzi, Kontzertuak, 23:00etatik aurrera: Komerik eta Kaparrak |
|
GAZTE TXOSNA (ERNAI) Gaur, Kontzertuak, 23:00etatik aurrera: Ziztada & Rlantz... Bihar, Manifestazioa Gudarien Plazatik, 19:30etan hasita: Ekainak 26, Kontzertuak, 00:30etatik aurrera: Zuriketan eta |
|
MUGIMENDU SOZIALISTAREN TXOSNA Bihar, Bertso saioa, 20:00ak aldera hasita: Aitor Bizkarra, Aroa Arrizubieta eta Andoni Rekondo |
|
BILGUNE FEMINISTAREN TXOSNA Gaur, Tonbola eta mokadu jana, 19:00etan Bihar, Tonbola 19:00etan Etzi, Playbacka 22:30etan, eta ondoren Kikilixalda DJ Ekainak 26, Batukada Feminista 19:00etan, eta Mojito Gaua 20:00etatik aurrera |
|
BOLTAIA Gaur, Magnolia (DJ Donostia) Bihar, Herriko taldeen gaua: Bloody Brotherhood, Khymaira eta Biersbreakers Etzi, Eira eta Beñaranks Ekainak 26, Nokono eta Samu (DJ Ereñozu) *Gauero 23:00etatik aurrera |