Eraso matxistei eta arrazistei aurre egiteko protokoloa aurkeztu zuten ostegunean, Tilosetako Joxepa Zubeldia kioskoan. Aurten ere irakurketarekin bat egin dute festetako eragile guztiek, eta prentsaurrekoan izan diren Mugimendu Feministako, Amherreko, Txoza Batzordeko, Berriak elkarteko eta Udaleko kideak.
Bertan adierazi zuten «indarkeriarik gabeko jaien aldeko urratsa» eman nahi dutela aurtengoan, denontzat «gozagarriak eta seguruak» izan daitezen: «Jaiek eta tradizioek jendarte ordena erreproduzitzen dute, egungo hierarkiak, botere harremanak eta rol banaketak nabarmenduta. Horregatik, jendartean eman nahi ditugun aldaketak gure herriko festetan islatu behar dira, jaietan ere kultura birsortzeko eta aldatzeko gaitasuna dugulako».
Festa eremuetan «intentsitate ezberdinetako erasoak» areagotzen direla azpimarratu zuten, bat bera ere onartuko ez dutela gehituta: «Ez dugu onartuko jai eremua erasotzaileen eta diskriminatzaileen aterpe bilakatzerik». Horren aurrean, garrantzitsutzat jo zuten eragile guztien arteko elkarlana: «Ezinbestekoa da erasoen prebentzioan eta erantzunean denok konpromisoak hartzea».
Erasoei aurre egiteko zenbait baliabide eta zerbitzu eskainiko dituzte eragileek, San Joanetako egunetan horiek erabiltzeko. Ondorengo taulan ikusgai daude zerbitzu bakoitzaren baliabideak eta ordutegiak.
|
BIZI DITZAGUN JAIAK ASKATASUNEZ ETA PLAZEREZ Harreman parekide eta askeetan oinarritutako festen alde, egin PLANTO ERASO MATXISTA ETA ARRAZISTEI! Ez zaitez konplize izan. Ondorengo zerbitzuak eta baliabideak daude martxan: 'INDARKERIA SEXISTARIK GABEKO GUNEA' Informazioa, eskuorriak eta pegatinak eskuratzeko aukera izango dute herritarrek. Gaur eta asteartean jarriko dute gunea, 18:00etatik 22:00etara, Tilosetan. Indarkeria sexistari buruzko kontzientziazioa landuko dute. ERASOTUA BAZARA, LAGUNTZA BEHAR IZANEZ GERO EDO ERASO BATEN BERRI EMAN NAHI BADUZU Emaginek kudeatutako arreta telefonoa. 24 orduz martxan egongo da: 688 68 51 64. Bilgune Feministako txosna 092 Udaltzaingoa |