Ikuskizun eta jarduera ugari San Joan jaietan, txikientzat eta gaztetxoentzat

Aurtengo San Joan jaietan ere, herriko txikientzako eta gaztetxoentzako ekintza ugari antolatu ditu jai batzordeak. Gaur eguerdiko 12:00etan emango zaie hasiera festei, baina aurrea hartu dute Urumea ikastolako ikasleek, izan ere, goizeko 09:00etan, haur kategoriako 45. marrazki eta pintura lehiaketan jardungo dute, Atsegindegin. Ordu t'erdi beranduago, gazteek maxkuriak hartu eta azeri dantzan osatuz, herritarren bizkarrak berotzera aterako dira, Kaxkoko zirrikituetatik barrena. 

Bihar, goizeko 11:30etan, Santa Barbara eta Etxeberri elkarteko haurrek danborrak hartuko dituzte, eta entsaiatutakoa praktikan jarriko dute herriko kaleak girotuz, eta arratsaldean, Ganso & So konpainiaren eskutik, Welcome ikuskizunaz gozatzeko aukera ere izango dute txikiek, Urbietan. 

Etzi goizean, haurrentzako parkea jarriko dute Atsegindegin eta Latxunbe auzoan, eta Txu-txu trena, aldiz, herrian zehar ibiliko da kaleak zeharkatuz. Hori goizeko 10:00etan izango da, eta bi ordu beranduago, erraldoi eta buruhaundiek hartuko dute lekukoa, ohi moduan, dantzan ibiliko dira maxkuriak eskuetan dituztela, herritarren bizkarrak gorri-gorri jartzeko asmoz. Arratsaldean, Mute izeneko zirku ikuskizunaz gozatzeko aukera ere izango dute gaztetxoek, Orain Bi taldearen eskutik. Urbietan izango da hori, arratsaldeko 17:00etan.

Ekainaren 26an, erraldoi eta buruhaundiez gain, arratsaldeko 17:30etan haurrentzako eta gazteentzako trial erakustaldia eskainiko dute, Latxunbeko kirol pistan. 

San Joan jaien azken egunean, haur kategoriako 45. Marrazki eta pintura lehiaketaren sari banaketa egingo da Biterin, eta eguerdiko 12:30etan, Trotamundos taldearen Finito-Infinito ikuskizunak Urbieta kalea hartuko du. Azken eguna agurtzen joateko, Gaztelekuak urteroko Su festa! antolatu du gaztetxoentzako, Tilosetan. Gauean, berriz, Deabru Beltzak taldeak Su danborrak ikuskizunak emango die amaiera, San Joan jaiei.