Astebete barru, gaur zortzi, ekingo dio traineru denboraldiari Hernaniko Arraun Elkarteak. Astilleron uretaratuko da 'Maialen' trainerua ekainaren 22an, arratsaldeko 16:45etan, Emakumeen Traineru Elkartearen Ligari hasiera emateko.
Oso talde gaztea osatu dute hernaniarrek, baina ez dira bakarrik egongo. Agerian geratu zen hori ostegun arratsaldean, Zinkoenean, traineru berdearen aurkezpenean. Zaleen indarrak batu eta Maialen Lujanbio amandrearen bedeinkazioa jaso zuten arraunlariek, denboraldiari ondo ekiteko.
Bi batel eszenatokiaren albo banatan jarrita, Ainitze Kalonje lehendakariak arraunlari gaztetxoenak deitu zituzten plazaren erdigunera aurrena, neguan osatu duten denboraldi polita nabarmentzeko. Segidan, arraun egokituko taldetxoa, gero eta haundiagoa, agertu zen jendaurrera: Beñat Odriozola, Leire Troitiño eta Eneko Mendizabal, Xabier Zabala entrenatzaileak gidatuta.
Eta orduan bai, 'Maialen'i eman zioten ongietorria: trainerua sorbaldan hartuta agertu ziren arraunlariak plazara, zaleen txalo artean. Denboraldiari begira gogotsu azaldu ziren Naia Peñagarikano patroia eta Maria Granado, arraunlaria izateaz gain prestatzaile fisiko lanetan ere ari dena: «Asko kexatzen dira, baina gogotik egiten dute lan, eta prest gaude lehiarako». Taldeaz harro eta denboraldiak emango duena ikusteko irrikaz agertu zen Maialen Lujanbio ere.
|
ETE LIGAKO EGUTEGIA Ekainak 22, Astillero Ekainak 23, Pasai San Juan Ekainak 29, Donibane Lohizune Ekainak 30, Zumaia Uztailak 6, Camargo Uztailak 7, Portugalete Uztailak 13, Kaiku Uztailak 20, Pedreña Uztailak 28, Lutxana Abuztuak 3, Hernani (Orion) Abuztuak 10, Ondarroa Abuztuak 15, Arkote, Plentzia Abuztuak 17, Zarautz Abuztuak 18, Deustu |
