Ampostako (Katalunia) triatloian podiumaren koska gorenera igo zen Luis Goñi hernaniarra. Distantzia erdiko errelebozkako proban, Arkaitz Elorza eta Xabat Manzisidor azpeitiarrekin batera osatutako Etxaun izeneko taldearentzat izan zen garaipena, joan den asteburuan.
Goñik igeriketako zatia egin zuen –1,9 kilometro–, bizikletakoa egin zuen Elorzak –90 kilometro–, eta korrika maratoi erdia eginda osatu zuen errelebozkako triatloia Manzisidorrek. 4.03.07 denborarekin irabazi zuen proba Etxaun taldeak, sailkapeneko bigarrenari 25 minutuko aldea aterata. Sei talde lehiatu ziren distantzia erdiko errelebozkako Ampostako proban.