Hainbat ikastaro prestatu ditu Hernaniko Udaleko Jarduera Fisiko eta Kirol Sailak, uztailerako. Zehazki, sei jardueratako ikastaroak izango dira, uretakoak zein lehorrekoak. Uztailaren 1etik 31ra eskainiko dituzte.
Uretan, igeriketa saioak prestatu dituzte, adin ezberdinetako herritarrei zuzenduta: 2007tik aurrera jaiotakoentzat adin tarteka, haurdunentzako saioak, lau hilabetetik gorako haurtxoei zuzendutakoak, eta helduentzako hastapen ikastaroak. Goizez izango dira saio gehienak.
Lehorrean, berriz, sei jarduera izango dira aukeran: pilatesa, ziklo indoor, body pumb, TRX, multifitness eta total training. Helduentzat izango dira, baina 12-16 urtekoentzako saioa ere prestatu dute total training ikastaroan. Jarduera guztietan, astean bi saio egingo dituzte, bakoitza 50 minutukoa.
Izenematea etzi arte, eta zozketa ostegunean
Ikastaro guztietan, izenemate epea zabalik dago. Etzi arte egin daiteke, kiroldegiko harreran eta bulegoan, edota online kirola.hernani.eus atarian. Webgune horretan bertan topatu daiteke ikastaroei buruzko informazio guztia, eta kiroldegian ere eskatu daiteke.
Prezioak ikastaro bakoitzaren araberakoak izango dira, baina kasu guztietan izango dute prezio merkeagoa kiroldegiko bazkide direnek. Ikastaro bakoitzeko plaza kopurua mugatua denez, jende gehiagok izena eman duen kasuetan zozketa egingo dute. Ostegun honetan bertan izango da zozketa, eta hurrengo egunean jarriko dituzte zerrendak ikusgai, arratsaldeko 14:00etan.