Talo Egunak eta Mendialdeko Azoka Ibiltariak bat eginen dute gaur, Goizuetan

Egun berezia izanen da gaurkoa goizuetarrentzat. Izan ere, bat egingo dute bertako Talo Egunak eta Mendialdeko Azoka Ibiltariak, herriko eta inguruko tradizioak uztartuta. 

Mendialdeko Azokaren helburua «publiko berriak erakartzea eta egonaldia luzatzea» da, bisitariek «lurraldea hobeto ezagutzeko»: «Horretarako, azoka ibiltariaren izaerarekin bat eginez, sukaldaritzako tradizio batez baliatu da, taloarena, oraindik Goizuetan errotuta dagoena eta, zeharka, tokiko beste produktu batzuk goraipatzen dituena». 

Taloaren Egunaren bidez, berriz, lurraldean bizirik dagoen ohitura gastronomiko bat oroitu eta transmititu nahi dute: «Aldarrikatu nahi dugu produktu xume honek, udaleko eta oro har, eskualdeko nekazaritzako eta abeltzaintzako ekonomia eta tradizioari eusteko egiten duen ekarpena». 

Talo egunaren baitan, erakusketa bat ere izanen da ikusgai, eta bertan, talogintzari lotutako antzinako argazki eta tresna zaharrak izango dira. Trasmisioa, talo tailer baten bidez gauzatuko dute, batez ere etxeko txikiei zuzenduta. Tailerra arratsaldeko 16:00etan izanen da, eta gainerako ekintzak, goizean gauzatuko dituzte. Horrez gain, beste bi erakustaldirekin osatuko dute egitaraua: lehenik, artaburuak aletzeari buruzko erakustaldiak egingo dituzte, eta ondoren, Saralegi Taloakeko kideek arto opila nola egiten den erakutsiko dute. 

Gorrititik Goizuetara iritsi da Azoka Ibiltaria

Gorritiri lekukoa hartu dio Goizuetak Mendialdeko Azoka Ibiltaria jasotzeko. Bosgarren edizioko hirugarren azoka antolatu dute gaurko, eta postu ugarirekin beteko dute herria. Horietan gazta, ezita, taloa, hestebeteak, haragia, zura, zeramika, metala eta beste zenbait produktu erosteko eta ikusteko aukera izango dute bertaratzen direnek. 

Guztira 24 postu izango ditu azokak; nekazaritzako elikagaien 12 eta eskualdeko artisauen 12. Antolatzaileek nabarmendu dute azoka honen bidez sustatu nahi dutela «Goizueta bezalako landa eremuetako ingurumenarekin, paisaiarekin, ekonomiarekin eta kulturarekin kontziente eta arduratsu den kontsumoa».