Festa giroa nagusituko da Karabel auzoan, igande honetan. San Joanetako ohiko kalejiren tankeran, erraldoi eta buruhaundiek jarriko dute saltsa, baina ez Hernanikoek: Bidasoako erraldoi eta buruhaundien bisita jasoko dute hernaniarrek.
Belkara Auzo Elkarteak antolatu du jarduera, Hernaniko Udalak sustatutako Kultur Biraren barruan. Eguerdiko 12:00etan abiatuko dira Oleta plazatik, Hernaniko dultzaineroek lagunduta; eta kalejiran ibiliko dira auzoan barrena, haur, gazte eta helduen gozamenerako.
Herritar guztiei luzatu die gonbitea Belkara Auzo Elkarteak, Karabelera gerturatu eta festa giroaz gozatzeko.
Oleta plazako estalkiari buruz, bilera gaur
Karabelen bertan, beste hitzordu bat ere badaukate auzotarrek gaurkoan. Oleta plazako estalkiaren proiektua lantzen ari da Hernaniko Udala, eta bilera irekia deitu du gaur arratsalderako, proiektua aurkeztu, auzotarren ekarpenak jaso eta zalantzak argitzeko.
Belkara Auzo Elkartearen lokalean (Oleta kalea 23, behea) izango da, 19:00etan hasita. Bileran parte hartzera gonbidatu dituzte auzotar guztiak.