Ostiral honetan egingo diete urteroko omenaldia, Loidiko oroitarriaren ondoan, lau mugalari hernaniarrei: Florentino Goikoetxeari, Juan Manuel Larbururi, Tomas Anabitarteri eta Martin Errazkini. Arratsaldeko 19:15etan izango da. Pirinioetako ihesaldietan parte hartzen zuten guztiak ere «gogoratu eta ohoratu» egingo dituzte, Euskal Pirinioak Askatasun Bideak elkarteak antolatutako ekitaldian; eta aurtengoan, bereziki, honako lauak: Maria Garaiar hernaniarra, 'Maddi' oiartzuarra, Andrée de Jongh ('Dedée') Comète sarearen sortzailea, eta Maritxu Anatola irundarra.
Larunbatean eta igandean, berriz, mugalarien oroimenezko ibilbidea osatuko dute Pirinioetan barrena, bereziki Josefa María Sansberro Etcheberriaren lana oroitzeko. Saratik Berara joango dira larunbatean, 09:00etan ekitaldia egin ondoren; eta Irundik Oiartzungo Ergoien auzora igandean, ordu berean abiatuta San Migeletik.