Galiziako topaketa batzuetan parte hartuko du aste honetan Goiz Eguzkiko Hartubol taldeak. Gaur bertan abiatuko dira hernaniarrak Galiziara, eta igandean egingo dute buelta, Galiziako eremu ezberdinetan zenbait jarduera eginda.
Guztira 28 jokalari joango dira irteerara, eta 12 pertsona gehiago batu dira espediziora, animatzeko eta antolakuntza lanetan aritzeko. Lehenengo topaketa bihar goizean izango dute, Ourenseko Los Remedios kiroldegian. Ekainaren 6an, ostegunean, Pontevedran jokatzeko aukera izango dute, eta ostiralean Vigoko taldearekin elkartuko dira, «haiek Hernanira egindako bisita itzultzeko helburuarekin». Topaketa guztien ondoren lagunarteko bazkariekin borobilduko dituzte egun guztiak.
Bidaia ondo aprobetxatzeko, atseden hartzeko eguna izango dute larunbata, bertako inguruak bisitatu eta lasai ibiltzeko.
Goiz eguzkiko kideek eskerrak eman nahi izan dizkiete bidaia hau antolatzeko lanean aritu diren pertsona eta erakunde guztiei, eta adierazi dute edonork dituela Hartubol taldean parte hartzeko ateak zabalik.