Gipuzkoako txapeldun izan ondoren, Arabako eta Bizkaiko talde onenak izan zituen aurrez aurre Hernanik, larunbatean: Euskadiko Txapelketa jokatu zuen Getxon, Gaztediren eta Getxoren kontrako triangularrean.
Maila ederrean aritu ziren hernaniarrak beste behin, eta azkeneko unera arte izan zuten garaipena lortzeko aukera; baina ihes egin zien azkenean. Trikoloreek 26-7 menderatu zuten Gaztedi, aurreneko partiduan; eta Getxoren kontra jokatu zuten bigarrena. Hori irabazita, Hernanira ekarriko zuten txapela... baina azkeneko minutuan lortutako entsaio bati esker nagusitu zitzaion Getxo (12-19). Hori horrela, hirugarren partiduan Getxok Gaztediren kontra galtzea behar zuten, baina bizkaitarrek lortu zuten garaipena. Hortaz, Euskadiko txapeldunorde izan dira trikoloreak, Getxoren atzetik.