Denboraldi bikainari erremate borobila jarri dio June Ruiz Belategi esgrimista hernaniarrak. Espainiako Txapelketan aritu da joan den asteburuan, Sorian; eta urrezko domina kolkoratu zuen sable modalitatean, 17 urtez azpikoetan.
Hutsik gabeko torneoa osatu zuen hernaniarrak. Aurreneko fasean bere lehia guztiak irabazi zituen, eta bigarren postuan sailkatu zen kanporaketetara. Garaipenak kateatzen jarraitu, eta final zortzirenak, final laurdenak eta finalerdiak gainditu zituen, orain arteko txapeldunarekin topo egiteko finalean: Valeria Verde madrildarrarekin. 15-9 nagusitu zitzaion June Ruiz, eta Espainiako txapeldun izan da kategoria horretan, bere aurreneko urtean. 15 urtez azpikoena irabazi zuen iaz.
Frantziako Txapelketan ere garaipena, Pauko taldearekin
Soriakoa ez da izan hernaniarraren lorpen bakarra, azkeneko asteotan. Izan ere, aurreko asteburuan taldekako Frantziako Txapelketan aritu zen Pauko taldearekin, 17 urtez azpikoetan, Bretainian. Eta garaipena eskuratu zuen horretan ere, taldekideekin batera.
Zita bakarra falta zaio hernaniarrari, denboraldia bukatzeko: maila absolutuko Espainiako Txapelketan hartuko du parte, ekainaren 8an Madrilen.