Urteko hitzordu bereziena izango du Kantuz abesbatzak, gaur arratsaldean: Kantuz Eguna ospatuko du Biterin, arratsaldeko 19:30etan hasita, areto nagusian eskainiko duen kontzertuarekin.
'Munduko musikak' jarri diote izena kontzertuari, horixe izango baita emanaldiaren jomuga: munduko hamaika txokotako abestiak ekarriko dituzte Hernanira, eta horien bitartez, munduan zehar bidaia egitea proposatuko diete herritarrei.
Abesbatzako kideekin batera, hainbat lagun izango dira areto nagusiko taula gainean: Ttarlako dantzariak, eta Javier Perez de Azpeitia pianojolea. Ohi bezala, Igor Arroyo ariko da zuzendari lanetan.
12 abestiko programa, mundu osoan barrena
Guztira, 12 abesti eskainiko dizkiete abesbatzako kideek bertaratuei. Agurraren ondoren, 'Rain dance' abestuko dute aurrena, 'Heleluyan' gero, eta 'Bring me little water, Silvy' segidan. Abestiz abesti, mundu osoan barrena ibiliko dira kontzertuaren bukaerara arte: 'Hawai'i Aloha', 'Trilo' Suediako abesti herrikoi tradizionala, 'Akai hana, shiroi hana' japoniarra, 'Ipharadisi' Hego Afrikako abesti tradizionala, 'Guantanamera' ezaguna, 'Rosa amarela' brasildarra, 'La Adelita' mexikarra, eta 'Mutil txaleko gorri' euskalduna, Resurrección María de Azkueren kantutegitik berreskuratu eta Junkal Guerrerok moldatutakoa.