Emaitza paregabeak lortu zituen Hernanik, aurreko astean, Herriarteko Txapelketaren final zortzirenetan. Joaneko hiru partiduak irabazi zituen Azkoitiren kontra, eta markagailuan alde nabarmena lortu. Hori horrela, 3-0eko eta 38 tantoko aldearekin joango dira hernaniarrak Azkoitira gaur, bueltako partiduak jokatzera. Gaueko 22:00etan hasiko da jaialdia, Gurea frontoian.
Lortutako abantailarekin eta erakutsitako mailarekin, hernaniarrek ez lukete arazorik izan beharko, kanporaketan aurrera egiteko. Nahikoa dute hiru partiduetatik bakarra irabaztea; baina hirurak galduta ere, guztira 29 tanto eginda ere lortuko lukete final laurdenetara pasea.
Joanekoan aritu zen seikotetik, hiru ariko dira gaur; maila bakoitzean bana: kadeteetan, Manex Alberdik Amets Makatzaga izango du lagun oraingoan; jubeniletan, Xuban Iturbe eta Oihan Legarreta ariko dira; eta nagusietan Xabier Salaberriak jokatuko du bueltakoa, Markel Lizeagarekin batera.
Gertukoen eta zaleen animorik ez dute faltako hernaniarrek Gurea frontoian, Azkoitira joateko autobusa jarri baitu CD Hernaniko Pelota Sailak.