Atzo gauean jarri zuten Hernaniko auzoetako festen lehenengo katebegia, Florida-Etxeberri auzoan. Gaueko 23:00etan bota zuten Mendekoste jaiak hasteko txupinazoa, eta jarduera ugariz gozatzeko aukera izango dute herritarrek, bihar eguerdira arte.
Festak gauean hasi baziren ere, arratsaldetik sortu zen giro ona auzoan. Izan ere, Etxeberriko pelotalekuan jokatu zituzten Mendekosteetako Pelota Txapelketako lehenengo partiduak. Hortaz, giroa bero-bero iritsi ziren 23:00etara; orduantxe piztu zuten lehenengo suziria, eta eztanda egin orduko atera zen helduen danborrada auzoko txoko guztiak girotzera. Urteroko legez, giro ederra sortu zuten bertako kaleetan.
Danbor hotsak jarraipena izango du gaurkoan ere, goizeko 11:00etan aterako baita auzoko haurren danborrada, bezperan gurasoek piztutako giroa birsortzera. Danborradaz gain, hirugarren W40K mahai jokoaren txapelketa, jubilatuentzako jolas ezagunak, luncha eta pelotako finalaurrekoak izango dira gaur goizean zehar.
Jarduera gastronomikoekin beteko dute eguerdia
Goizeko jardueretan sortutako goseari erremedio ezinhobea emango diote eguerdian. 13:00etan egingo dute ohiko patata tortila txapelketa, eta ordu t'erdi beranduago, 14:30etan, paella jate herrikoia antolatu dute Etxeberriko pelotalekuan.
Arratsalderako energia pixka bat gordetzea gomendagarria izango da gaurkoan, betekadarekin bukatuta ere ez baita siesta egiteko denborarik geratuko. Haurrek kirol jolasak eta txokolate jana izango dute, eta helduak Etxeberri Elkarteak antolatutako Mus Txapelketan arituko dira. Ondoren, 18:30ak aldera, Tor Magoaren ikuskizunak hartuko du protagonismoa.
Iluntzerako, afari herrikoiaren aurretik eta ondorenerako, GorkaMendDJ-en disko festa antolatu dute, eta eguna borobiltzeko zezen suzkoa eta su artifizialak izango dira.
Lehiaketekin amaituko dituzte Mendekosteak
Biharko eguna hildakoen omenezko mezarekin hasiko dute, 11:00etan. Ondoren, 12:00etan jokatuko dituzte, auzoko frontoian, Pelota Txapelketako final haundiak. Bitartean, sagardo dastaketa antolatu dute, eta III. sukaldaritza lehiaketak emango dio zapore berezia. Aurtengoan ere osagai sekretuekin sukaldatu beharko dute parte hartzaileek, eta ikusteko dago ea nork eramango duen txapel preziatua etxera.
Jaiak hasi bezala amaituko dituzte: burrunbarekin. Izan ere, eguerdiko 14:30etan azken traka botako dute.
|
MENDEKOSTE JAIAK FLORIDA-ETXEBERRI AUZOAN GAUR 09:00-19:00, Mendekosteen 10:00, Pelota Txapelketaren finalaurrekoak 11:00, Haurren danborrada 11:00, Jubilatuentzako jolas ezagunak eta luntxa 13:00, Patata tortilla txapelketa 14:30, Paella-jate herrikoia, Etxeberriko frontoian 16:00, Mus Txapelketa, Etxeberri Elkarteak antolatuta 16:00, Kirol jolasak 4-15 urtekoentzat, Denontzat gimnasioak antolatuta 17:30, Haurrentzako 18:30, Tor Magoaren ekitaldia, Etxeberriko frontoian 20:00, Bingo herrikoia 21:00-00:30, Disko festa, 21:30, Afari herrikoia, 23:00, Zezensuzkoa eta BIHAR 11:00, Meza nagusia, 12:00, Pelota Txapelketaren finala 12:00, Sagardo dastaketa 14:30, Jaien amaiera eta azken traka |