Extremadurako jardunaldiak 2024 urteurren berezia biziko du. Aurten, 30. urteurrena ospatuko du eta Extremadurako kultura herrian zabaltzeko aukera paregabea izango da. Pasa den urtean itzuli zen ohiko hilabetera, maiatzera, eta bertan mantenduko dute aurten. Hain justu, larunbatean, maiatzaren 4an ospatuko dute jardunaldia Atsegindegiko estalpean. Donostiako Centro Cultural Extremeñok antolatzen du eta laguntzaileak dira Extremadurako Junta, Badajozeko Diputazioa eta Hernaniko Udala.
Larunbatean, Extremadurako zapore eta usainak iritsiko zaizkie hernaniarrei. 10:00etan hasita Atsegindegin, Extremadurako jaki gastronomikoen festa egongo da; probatu, dastatu eta erosteko aukerarekin.
Postuak jarriko dituzte, bertako gastronomiarekin eta informazio turistikoarekin. Pintxoak eta ardoa ere izango dira aukeran. Goiz osoan egongo dira bertan, eta ondo girotuta, gainera. Musikak ez du etenik izango, Extremadurako jotekin eta kantu tipikoekin, eta dantza ere ez da faltako.
Gainera, 13:00etan, ohiturari jarraituz Virgen de Guadalupe taldeko koru eta dantzariek emanaldia eskainiko dute Atsegindegin bertan Extremadurako jantzi tradizionalekin.