Udazkenean jokatuko da Gipuzkoako Bertsolari Txapelketa, eta horretara sailkatzeko fasea hastear dira Hernaniko Bertso Eskolako hainbat kide. Horri begira, buru-belarri ari dira lanean asteotan, eta entrenamendu saio bereziak prestatu dituzte gaurko eta biharko, Harituz Tolosaldeko Bertsozale Elkargunearekin bat.
Adunan izango da aurrenekoa gaur, 18:30etan Elordiko lokalean. Bertan ariko dira Iker Ormazabal 'Tturko', Eli Pagola eta Ekain Tolaretxipi, beste hiru bertsolarirekin: Iñigo Gorostarzu 'Etxorde' berastegiarra, Jon Mendiluze irurarra, eta Txomin Azpiroz anoetarra.
Biharko saioa, berriz, Hernanin egingo dute, 19:00etan Sandiusterriko aretoan. Andoni Rekondok eta Andoni Mujika 'Anatx'ek hartuko dute parte etxeko saioan, beste lau bertsokiderekin: Beñat Iguaran amasarra, Beñat Zeberio asteasuarra, Lierni Rekondo lasartearra, eta Jon Luzuriaga ikaztegietarra.
Doakoak izango dira bi saioak, eta herritar guztiak gonbidatu dituzte.