Ez da etxegabetzerik gauzatu, gaurkoan behintzat, Andre Kaleko bigarren atarian. Goizeko 10:00etarako zegoen aurreikusita, eta hori gelditu nahian, bertaratzeko deia egin diete Buruntzaldeko Etxebizitza Sindikatuak eta Kaleratzeak Stopek herritarrei. Halaxe gertatu da, eta 50 lagun baino gehiago elkartu dira atarian, ordubete lehenagotik, etxegabetzeen kontrako pankartekin. Haiek izan dira bertaratutako bakarrak, ordea: goizeko 10:00etarako ez dira agertu etxegabetzea gauzatu behar zutenak.
Ordua igarota, Kaleratzeak Stopeko ordezkariek bertaratuei jakinarazi diete, dagoeneko etxegabetzerik ezingo zutela gauzatu gaurko egunez, eta orain, izatekotan, beste hitzordu bat jarri beharko dutela horretarako. Zita berria jakin bezain pronto emango dute horren berri, etxegabetzea eteteko asmoz.