Biteriko areto nagusia dantzan jarri zuen Bizipoza Elkarteak, atzo arratsaldean. Baina beroketa besterik ez zen izan: apirilaren 27an ospatuko dute Bizipoza Jaia Hernanin, eta hori aurkezteko ekitaldia zen atzokoa.
Bizipoza osatzen duten 38 elkarteek eta herriko eragileek egin dute bat jaiaren antolaketan, eta horietako hainbat presente izan ziren atzoko ekitaldian: Bizipoza bera, Hernaniko Udala, Dobera Euskara Elkartea, Super H Elkartea, Gaztelekua, Pausoka Elkartea, Kanika Aisialdi Taldea, Totem eta Mitxelena babesleak, eta Hernaniko Boleibol Taldea.
Umoretsu aritu ziren, aurkezle lanetan, Zapotxin eta Porrotx pailazoak; eta trikitilariek eta Ttarlako dantzariek girotu zuten ekitaldia. Izan ere, horrelakorik ez du faltako Bizipoza Jaiak, «denona eta denontzat beharko lukeen gizarte inklusibo bat eraikitzeko bidean», euskeratik eta euskeraz.
Jaiaren beroketa lanak ikasleek, apirilaren 26an
Apirilaren 27an izango da festa haundia, baina bezperan hasiko dituzte beroketa lanak. Izan ere, 'Badator Bizipoza Jaia!' ekimena prestatu dute, Hernaniko ikastetxeen eskutik, hilaren 26rako. Plazan elkartuko dira horretarako, arratsaldeko 15:15etan.
Biharamunean, berriz, Atsegindegi, Urbieta kalea eta Biteriko plaza izango dira inklusioaren erdigunea. Denetik izango da horietan: elkarteen jardunaren berri emateko gunea, jolasak, tonbola, 'Go!azen'eko lagunen ikuskizuna, musika, dantza, paella jatea, pailazoen emanaldia, erromeria, hartubol erakustaldia...
Atzoko ekitaldiaren bukaeran aurkeztu zuten egitarau osoa, aretoa bete zuten herritarren irrika piztu ondoren. Izan ere, egitarauaren berri eman aurretik, jaiaren eredu laburtua izan zen ia, Biterin eskaini zutena. Ez zuten huts egin abestiek (Ai Zapotxin, Axeri Dantza, Epoitaitaie eta Agur bat lagun maite), trikitilariek girotuta; ezta Ttarlako dantzarien saioak ere. Bertaratuen barre algarak eragin zituzten Zapotxinek eta Porrotxek, buruhaundien ipurdikoak tarteko. Jolasean aritu ziren Kanikako kideak eta Hernaniko Boleibol Taldekoak, taula gainean bertan. Eta hitz goxoak izan zituzten Totem eta Mitxelena babesleek, Hernaniko Udalak, Pausoka eta Super H elkarteek, eta Bizipozak berak. Bizipoza Eskola ere aurkeztu zuen Leire Elizegi koordinatzaileak. «Hezkuntzaren eta Bizipoza Elkartearen arteko harremana aspalditik dator, eta ekarpen praktiko bezain garrantzitsu eta beharrezkoa egitera dator Bizipoza Eskola: Hezkuntza inklusiboa», nabarmendu zuen.
Beroketa ederra izan zen atzokoa, eta osagai guztiak prest daude, apirilaren 27ko festa bete-betekoa izan dadin.
BIZIPOZA JAIA-APIRILAK 27 |
ATSEGINDEGIN10:30-14:30, Bizipozako elkarteen gunea 10:30-14:30, Bizipoza jolasa 10:30-14:30, 'Euskal tonbola', Dobera Euskara Elkartearen eskutik 11:00, 'Go!azen'eko lagunen ikuskizuna 11:30, Hernaniko erraldoi eta buruhandien konpartsa, herrian zehar 11:45, Ttarla dantza taldearen emanaldia 12:30, Hernaniko Musika Eskolako trikitilariak, herrian zehar 12:45, Bizipozako elkarteei eskertza eta aitortza ekitaldia 13:30-15:30, Paella jatea, Pausoka Elkartearen eskutik 16:00, Zapotxin, Porrotx eta Marimototsekin irri, kantu eta dantza 17:30, Merienda 18:00, Itzal taldearekin erromeria URBIETA KALEAN10:30-14:30, Kanika Aisialdi Taldearen, Aratz Ikastolaren eta Gaztelekuaren haurrentzako tailerren gunea 12:00, Hernaniko Boleibol Taldearen hartubol erakustaldia BITERIKO PLAZAN10:30-14:30, Bizipozako elkarteen tailerrak 12:15-14:30, Hernani Burujaberen Altxorraren Bila |