Datorren astean egitasmo berri bat jarriko du martxan Hernani Burujabeko Bidea Herritar Taldeak: auzo batzarrak. Zortzi bilera egiteko hitzordua jarri dute, herriko eremu bakoitzeko beharrak identifikatzeko; izan ere, Hernani Burujabetik azaldu dutenez, «auzoetan egingo diren saio guzti hauek, herriaren diagnostikoa egitea dute xede».
Auzo batzarrak egitearen arrazoia hiru helburu zehatzetan banatu du Hernani Burujabek. Hasteko, Hernani Burujaberen jarduna auzoetara helarazi nahi dute, orain arte egindako lana ezagutarazteko. Horretarako, proiektua bere osotasunean azaltzeaz gain, lan ildo eta esparru ezberdinetan garatutako proiektuei buruzko xehetasunak emango dituzte batzarretan.
Proiektuak ezagutaraztearekin batera, herritarrak horietara batzea da Hernani Burujabeko kideen bigarren helburua. Bilerak baliatu nahi dituzte «inplikazioa, aktibazioa eta konpromezu kolektiboa» pizteko. Azkenik, auzoei lotutako helburua jarri dute, tokian tokiko beharrak ezagutu eta horietan ekiteko: «Beharrezkoa zaigun informazioa jaso nahi dugu aurrera begirako lehentasunak aurreikusteko eta diagnostikoa egiteko. Hori izango da proiektuak auzoekin lotzeko abiapuntua».
Burujabetzen Kontseiluaren bidelerroa markatuko du diagnostikoak
Auzoz auzo egingo dituzten batzarretatik eratorritako informazioak Burujabetzen Kontseilua ardazteko ere balioko du. Hernani Burujaberen urteko helburuetako bat da Burujabetzen Kontseiluaren behin behineko osaketa: «Planifikazio marko gisa eratzen da kontseilua, eta Hernaniren bilakaera sozial, ekologiko eta ekonomikoa norabidetuko duen planifikazioa modu garden, zuzen eta demokratikoan definitzeko zeregina edukiko du», azaldu dute.
Horretarako, Hernani Burujabetik ezinbestekotzat jo dute herritarren parte hartzea: «Modu garden, zuzen eta demokratikoan egin beharreko planifikazioa diogu. Hori dena, ordea, ezin lortu herritarrak prozesu horretan parte aktibo izan gabe; horri erantzuna emateko asmoz, hain zuzen, antolatu dira auzo batzar hauek».
Hurrengo urteko ekintza plana auzoetan identifikatutako beharrekin osatuko dute; hau da, Hernani Burujabe osatzen duten sektoreek diagnostiko horietan oinarritu beharko dute euren jarduna. Horrez gain, Burujabetzen Kontseiluak onartuko ditu Hernani Burujaberen lehentasunak eta aurrekontuak, bertan sektore guztiek izango baitute ordezkaritza.
Zortzi saio, apirilaren 16tik maiatzaren 16ra
Guztira zortzi saio antolatu ditu Hernani Burujabek. Lehenengoa apirilaren 16an izango da, arratsaldeko 18:30etan, Etxeberriko Auzo Elkartean. Azkena, aldiz, maiatzaren 16an izango da, hau ere 18:30etan, Zelabide Auzo Elkartean. Auzoak taldeka sailkatu dituzte, eremu zabalagoak hartuta, baina nabarmendu dute lehentasuna herritarrek parte hartzea dela: «Bere auzoko hitzordura joan ezin dena, interesa izanez gero, beste bilkura batera azaltzera animatzen dugu; bilatzen duguna jendeak parte hartzea baita».
HERNANI BURUJABE
AUZOETAKO BATZARRAK
APIRILAK 16 - 18:30
ETXEBERRIKO AUZO ELKARTEA
Sagastialde, Sagastialde berri, Iturmendi, Etxeberri, Laiztiaga, Florida, Bestizan kalea eta Antziola.
APIRILAK 18 - 19:00
KARABELGO AUZO ELKARTEA
Karabel, Osiñaga, Portu, Akarregi, Zikuñaga eta Martindegi.
APIRILAK 23 - 18:30
BITERI KULTUR ETXEA
Erdigunea.
APIRILAK 25 - 18:30
BITERI KULTUR ETXEA
Kaxkoa.
MAIATZAK 7 - 19:00
EREÑOTZU
Epele, Lastaola, Ereñotzu eta Pagoaga.
MAIATZAK 9 - 18:30
URUMEA IKASTOLA
Santa Barbara, Tellerigain, Sandiusterri, Karobieta, Lizeaga, Elizatxo eta Txantxilla.
MAIATZAK 14 - 18:30
SORGINTXULOKO AUZO ELKARTEA
Latsunbe, Latsunbeberri, Marieluts, Sorgintxulo, Jauregi bailara eta Galarreta.
MAIATZAK 16 - 18:30
ZELABIDE AUZO ELKARTEA
Zelabide, Florida, Karmelo Labaka, Mañe i Flaquer eta Montevideo.
*Hernani Burujabe: «Aipatu nahiko genuke, datak auzoka banatu ditugula; hori bai, lehentasuna da herritarrek parte hartzea. Hortaz, bere auzoko hitzordura azaldu ezingo balu, interesa izanez gero beste bilkura batera azaltzera animatu nahiko genuke; bilatzen dena jendeak parte hartzea baita».