Ez da asteburu onena izan bailarako palistentzat. Hiru partidu jokatu dituzte, eta hirurak galdu. Grabni txapelketan, ezker horman paleta gomaz, Amaia Irazustabarrenak eta Garazi Eizmendik 30-18 galdu zuten, Gasteizen, Ruiz de Azuaren eta Salanuevaren aurka. Garaipena, beraz, Araban geratu zen. Trinketean ere, Araba nagusi izan zen. Gipuzkoa ordezkatu zuten, paleta argentinarreko modalitatean, Miren Goikoetxeak eta Leire Galdosek; baina galdu egin zuten (30-13), Saezen eta Saezen aurka.
Gipuzkoako Banakako Txapelketan, ordezkaririk gabe
Gipuzkoako Banakako Txapelketan, bestalde, Urumea bailara ordezkaririk gabe geratu da. Mikel Manterolak 25-12 galdu zuen Conderen aurka, Elgoibarren, bigarren mailako final laurdenetan, eta ezin izan du finalerdietara sailkatu.