Protagonista izaten ari da zinea Aste Santuko oporraldi honetan, eta bide horretan bere alea jarriko du Hernani Zineklubak ere. Izan ere, saio berezia prestatu du oporraldirako, eta The Goonies filma jarriko du etzi, ostiralez, Biteri kultur etxean.
Arratsaldeko 16:45etan hasiko da saioa, eta 111 minutuko iraupena dauka filmak. 1985ekoa da filma, Richard Donnerrek zuzendutakoa, abenturazkoa. Euskerara bikoiztuta jarriko dute etzi Biterin. Sarrerak dagoeneko eskuragarri daude, 3 euroan, Biteriko lehiatilan bertan edota kultura.hernani.eus atarian.
Zazpi lagun dira protagonista, Goonietarren taldea osatzen dutenak. Eguraldi petraleko arratsalde batean, etxezuloan elkartuko dira. Ganbarara igo eta antzinako hainbat gailu zahar eta bitxi topatuko dituzte bertan. Horien artean, 'Willy begibakarra' izeneko itsasgizon baten altxorraren mapa aurkituko dute; mende batzuk atzera bere eskifaiarekin batera desagertu zen piratarena, hain juxtu. Horrekin, altxorraren bila abiatuko dira zazpi lagunak, euren familien egoera ekonomiko zaila konpontzeko esperantzan. Lortu ezean, zin egin dute Goonietarren taldea betirako desegingo dutela.
Zineklubaren ohiko saioa, apirilaren 11n: 'Past Lives'
Oporraldirako propio prestatutako saio berezia da etzikoa, baina hileroko ohiko saioa ere egingo du Hernani Zineklubak apirilean. Hilaren 11n izango da hori, hurrengo ostegunean: Past Lives filma jarriko dute Biterin, arratsaldeko 19:00etan hasita.
Celine Songek zuzendutako filma da, 2023koa, eta jatorrizko hizkuntzan jarriko dute, ingelesez eta koreeraz, gaztelaniazko azpitituluekin. Horretarako ere, salgai daude sarrerak.