Balenciagaren eta Chillidaren obren 'elkarrizketa', Getariako museoan

Kronika - Erredakzioa 2024ko api. 3a, 00:00
Chillidaren eta Balenciagaren lan bana, Getariako museoko erakusketan.

Bi egileen lanak aurrez aurre jarri dituzte Cristóbal Balenciaga museoan, 'Topaketak' izeneko areto berrian.

Eduardo Chillidaren eta Cristóbal Balenciagaren obren arteko 'elkarrizketa' sustatu dute, elkarlanean, Hernaniko Chillida Leku museoak eta Getariako Cristóbal Balenciaga museoak. Horrela, bien lanak aurrez aurre jarri dituzte Getariako museoan, bertan sortu berri duten 'Topaketak' aretoa inauguratzeko: 'Chillida/Balenciaga, plegar la forma' izena jarri diote erakusketari.

Eta topaketa horretarako, bi autoreen arteko loturarekin bat egiten duen obra da Hernanitik Getariara eraman dutena: Eduardo Chillidaren 'Balenciagaren omenez' obra, hain juxtu, 1990ean sortu zuena. Gainera, Cristóbal Balenciaga Fundazioaren sortzaileetako bat izan zen Chillida bera, 1999an.

«Bereziki aproposa iruditu zaigu 'Topaketak' aretoa inauguratzea erakusketa honekin, eta aukera paregabea izan da 'Balenciagaren omenez' obra Ge­tariara ekartzeko», nabarmen­du du Igor Uriak, Cristóbal Balenciaga museoko bildumen zu­­zendari denak. Miren Vivesek, mu­seoko zuzendariak, gaineratu zuen erakusketa honekin bat egin nahi izan dutela Eduardo Chillidaren jaiotzaren mendeurreneko ospakizunarekin, «gure omenaldi propioarekin, xumea bezain beharrezkoa, eta emozioz betetakoa».

 

Hainbat jarduera elkarlanean, datorren urtera bitarte

Erakusketaz gain, egitarau komuna prestatuko dute bi muse­oek, datorren urtera bitarte lu­zatuko dena, hainbat ekintzarekin. Urriaren 19rako, jardunaldi bat antolatuko dute, bi artisten arteko loturak aztertzeko, Carmiña Dovale ikertzailearen eta Igor Uriaren partehartzearekin. Getariako museoan egingo dute, eta doakoa izango da.

Hori baino lehenago, abuztuaren 10ean, 'NOEUD' dantza emanaldia eskainiko du Dantza Arte Bitartekaritzak, Donostiako Musika Hamabostaldiarekin elkarlanean. Eta haurrei begira, bi saio aurreratu dituzte: bata, musika eta sormena uztartuko dituena, Donostiako Orfeoiarekin elkarlanean, Musikaren Europako Egunaren bueltan; eta bestea, udazkenean, Maushaus kolektiboaren eskutik, erakusketako elkarrizketaren edukian sakonduko duena.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!