Gazte mailako Aurresku Txapelketa antolatu dute, gaur goizerako, Hernanin. 11:00etan izango da, Biteri kultur etxeko areto nagusian, eta doakoa izango da sarrera, bertaratu nahi duten guztientzat. Gipuzkoako euskal dantzarien biltzarrak antolatu du, Hernaniko Udalak, Gipuzkoako Foru Aldundiak eta Etorkizuna Orain Gipuzkoak lagunduta.
Guztira, 31 dantzarik hartuko dute parte, ondorengo herrietatik etorritakoak: Aduna, Amasa-Villabona, Areso, Donostia, Elgoibar, Errenteria, Legazpi, Leitza, Lezo eta Zizurkil.
Bi multzotan banatuko dituzte partehartzaileak, adinaren arabera: 2014 eta 2016 urteen artean jaiotakoak A multzoan; eta 2011 eta 2013 urteen artean jaiotakoak B multzoan.
Lau dantza ezberdin eskainiko dizkiete dantzariek ikusleei: Ormatxulo, Agurra, Hondarribi Handia eta Legazpiko zortzikoa. Epaimahaia, berriz, hiru dantzari eta adituk osatuko dute: Katerin Artolak, Nahikari Vizuetek eta Idoia Besadak.