Kontzertu bana eskainiko dute gaur arratsaldean Hernaniko Gazte Bandak eta Hernaniko Musika Bandak, Atsegindegin. 18:00etan hasiko da gazteen emanaldia, eta helduek hartuko dute lekukoa ondoren.
Roberto Pachechoren zuzendaritzapean arituko da Gazte Banda, eta bost obra eskainiko dituzte; horien artean, Coldplay taldearen klasikoak eta Michael Jacksonen hit mix-a.
Musika Bandak, berriz, Josu Ortiz Delgado konpositore gaztearen errepertorioaren monografikoa eskainiko du: «Horrelako mailako konpositoreek beren obrak Hernaniko Musika Bandak interpretatu nahi izateak asko esaten du herrian dugun musika mailari buruz», azaldu dute antolatzaileek. Guztira, laudioarraren zazpi pieza eskainiko dituzte, eta horietako batean (Jazzphony) bakarlari modura arituko da Aritz Ostolaza saxofoilaria.