Pasa den asteazkenean Iruña Veleiarekin lotutako mozioa aurkeztu zuten zenbait herritarrek Hernaniko Udalean. Mozioan egindako eskaera honakoa da: «Hernaniko Udal Batzarrak onar dezala Arabako Foru Aldundiaren Kultura eta Hizkuntza Politika Sailak berriro ekin diezaiola sail horretan LURMEN enpresak erregistratu zituen 61 kaxa garbitzeko lanari. Lan horiek bertan behera gelditu baitziren kaxa garbitu eta gero».
Diotenez, garbitutako bi kaxetatik irudi bat eratorri zuten: «Hegazti bat zen, galburua mokoan zuela». Horren ondoren bertan behera geratu ziren garbiketa lanak, eta mozioa aurkeztu duten herritarrek nabarmendu dute «probabilitate haundiak» daudela kaxa horietan «testu gehiago azaltzeko».
Ondorio modura, garbiketa lanak berrabiarazteko arrazoi nagusia eman dute: «Irulegiko eskuaren testua interpretatzeko garaian, batzuek diote testu gehiago behar direla eskuak dakarren testua interpretatu ahal izateko».