2024ko egutegia datorren astean jarriko du martxan Hernani Errotzenek. Bi hitzaldi antolatu dituzte martxoaren 20 eta 21erako, urteroko konpromiso bera mantenduta: «Historia, herri oroimena edota euskal kulturan garrantzia izan duten pertsonen ekarpenak jorratzea».
Asteazkeneko hitzaldian Peio Monteano Sorbet, historian doktorea eta Nafarroako artxibo orokorreko goi teknikaria, izango da hizlaria. 'Vasconia en los siglos oscuros' izenburupean, Inperio erromatarra erortzetik Nafarroako erresuma sortu arteko garaiari buruzko azalpenak emango ditu. Arratsaldeko 19:00etan hasiko da saioa, Biterin.
Ostegunean, berriz, Joxin Azkue Gabilondo Hernandorena Kultur Elkarteko kideak eskainiko du 'Nola sortu herriko armarriaren irudi berria' hitzaldia. Hau ere 19:00etan izango da, Biterin.