Hernanin izango da Eñaut Elorrieta musikari eta abeslaria, martxoaren 16an. 'Fantasia' disko berria aurkeztuko du bizkaitarrak Biterin, iluntzeko 19:30etan hasita. Sarrerak salgai daude 8 euroan, Biterin bertan edo 'kultura.hernani.eus' webgunean.
Hamar kantuk osatzen dute bere lan berria, eta Aitor Etxebarria izan du ekoizle eta bidelagun. Azken bi urteetan eskuz esku egindako lanaren emaitza da 'Fantasia', eta Elorrietaren berezko esentzia harrapatzen saiatu da Aitor Etxebarria, «hari modura maitasuna duten kantu soil, bare eta ederrak» bilduz diskoan.
Kantu guztiak abeslari gernikarrak konposatutakoak dira, eta berak idatzitako hitzez gain, Uxue Alberdi, Iñigo Astiz, Jose Luis Otamendi edo Itziar Ugarte idazleen lanak musikatu ditu.
Biteriko kontzertuan, 'Fantasia' diskoko kantuez gain, bere ibilbide osoko kantuak eskainiko ditu Eñaut Elorrietak. Oholtzan izango dira beste lau kide ere: Ander Zulaika bateriarekin, Ruben Caballero gitarra elektrikoarekin, Fernando Neira baxuarekin, eta Txus Aranburu teklatuekin.