Hitzaldi-solasaldia antolatu du Amher elkarteak, bihar arratsalderako, Euskal Autonomia Erkidegoko osasun sistemaren funtzionamenduari buruz. Osasun arloko bolondresek eskainiko dute, eta helburua da osasun sistema hobeto ulertzeko tresnak eta ezagutza eskaintzea.
Arratsaldeko 18:00etan izango da saioa, Kulturarteko Plaza Feministan; eta bereziki prestatuta dago Hernanira duela gutxi etorri diren bizilagunentzat. Osasun sistemaren funtzionamendua azalduko diete, eta izan ditzaketen zalantzak argituko dizkiete. Horrela, saioan landuko diren gaietako batzuk dira honakoak: lehen mailako arreta, larrialdi zerbitzuak, ospitalea eta ospitalizazioa, pediatria, ordainketak eta ingresoak, minbizia detektatzeko programak...
Amherrek bertaratzeko gonbitea luzatu die interesa duten herritar guztiei, eta era berean, eskaera luzatu du, interesa izan dezakeen norbait ezagutuz gero, saioaren berri emateko.