Dorleta Kortazar (Eskoriatza, 1974) ipuin kontalariaren eskutik, Ispiluak ipuin emanaldia eskainiko da gaur, 17:30etatik aurrera Kulturarteko Plaza Feministan.
Ispiluan beren buruari begiratu eta beste aldera gurutzatzeko ausardia izan duten emakumeen istorioek osatzen dute Ispiluak lana.
Dorleta Kortazar Heldu da kontua zirkuituan sariduna izan zen 2023an eta bere lana, «aspalditik buruan nuen ideia bat zen, garatzen ari nintzena. Ispiluak ikuskizuna oraindik nire barruan bizi da».
Idazleak dioenez, «gezurra, bortxa, mesfidantza eta beldurra gaindituz, estutzen dituzten loturetatik askatu eta zigorrak zigor, basoan aurrera egitea erabaki dutenak osatzen dute Ispiluak. Bizinahia eta beldurra, bizitza eta heriotza, gaua eta eguna, ametsak eta errealitatea… elkarri begira, elkarren isla, gure barruko (h)egietan oihartzun eginez. Leku askotan aurki ditzazkegulako gure islada itzuliko diguten ispiluak».
Gustukoa izan ala ez, norbait ez bada sekula helduei zuzendutako ipuin saio batean izan, ikusteko gonbidapena egiten du Dorleta Kortazarrek. «Seguru sorpresa hartuko duela eta espero ez duen zerbait aurkituko duela. Bizitzeko esperientzia bat dela esango nuke».