Haurrentzako antzerki saioa prestatu dute gaur goiz-eguerdirako, Biteri kultur etxean; eta saio goxoaz gozatu ahal izan dute etxeko txikienek, gurasoekin batera. Izan ere, Biteriko areto nagusiko oholtza baso bilakatu dute, bere zuhaitzekin eta lurrera eroritako hostoekin; eta argiztapen xumea baliatuta, sutondoan amonaren ipuinez bezalaxe gozatu dute istorioaz.
40 minutuko bi saio eskaini dituzte Laia Piró, Neus Umbert eta Esther Westermeyer antzezleek, oholtzan bertan, haien inguruan borobil-erdi bat osatuta, 50 bat haur eta guraso zituztela. Denek elkarrekin deskubritu dituzte basoak eskainitako altxorrak eta bere magia.