Hernaniko alderdi jeltzalea «pozik» agertu da, EH Bilduk kontutan izan dituelako EAJk «Hernani hobetzeko» aurkeztutako proposamenak. EAJren arabera, «EH Bilduk erabili du Txotx kanpainari laguntzeko, EAJk 2023ko hauteskunde kanpainarako sortutako oinezkoen Zinkoneako fotomuntaia».
Hala ere, Andoni Amonarraiz, EAJko bozeramailea, ondorengoagatik kexatu da: «gustatuko litzaiguke udalaren barneko bidetik jakinarazi izan baligute, begi onez ikusten zela Zinkoenea oinezkoentzat jartzea, eta ez sare sozial bidez jakinaraztea. Baina gure ekarpenek une honetan udaleko agintea duen EH Bilduri begiak zabaltzeko balio badute, primerakoa iruditzen zaigu».
Hernaniko EAJk azaldu du herriaren hobekuntzei buruzko ideia guztiak Hernaniko gobernu taldeari helarazteko prest dagoela, eta adibideak elkarbanatu ditu: «Gudarien Plaza egokitzea, Floridako autoentzako eta oinezkoentzako lurpeko pasabidearen sakontasuna; mirakuluaren ingurunea eta erdi estalitako plaza haundi bat eraikitzea; etab. Zinegotziak Hernaniri buruzko beste hobekuntza-ikuspegi bat emateko gaude, eta ikuspegi hori gainerako alderdi politikoek partekatzen badute, primeran. Ez da beldurrik izan behar besteen ideiak egokiak izan daitezkeela onartzean. Lehentasuna Hernani da».