Odol Emaileen Elkartetik hamazazpi hernaniar omenduko dituzte larunbat honetan. Zehazki, donazio zifra borobila bete berri duten emaileak omenduko dituzte: odola 25, 40, 50, 60 eta 75 aldiz eman duten pertsonak.
Gudarien Plazan jarri dute lehenengo hitzordua, eguerdiko 13:30etan. Bertan taldeko argazkia egingo dute omendu guztiekin, eta denak batera joango dira Tripontzira, bertan bazkaltzeko. Ondoren, bazkalostean, diplomak eta pinak banatuko dizkiete Odol Emaileen Elkarteko kideek.
Beherakada haundia izan da estrakzioetan
Omenaldiaz gain, Odol Emaileen Elkartetik jakinarazi dute beherakada haundia izan dela odol estrakzioetan: «Pandemiak kalte haundia eragin du, jendea jada ez da etortzen, eta jubilatzen den jendearekin jaitsiera nabarmena da». Horregatik, deialdia egin diete herritar guztiei odola ematera animatzeko.