Hernaniko Eskubaloi Taldeko kadeteek ezin izan dute igoera lortu. Asteburu honetan jokatu ditu Hernanik igoera faseko hiru partiduak, eta norgehiagoka guztietan ondo lehiatu arren, ez du helburua lortzerik izan.
Ostiralean jokatu zuen lehenengo partidua, Urolaren aurka. Partidu ona jokatu zuen, baina emaitza ez zen aldekoa izan; 26-40. Larunbateko eta igandeko partiduetarako jokalariei konfiantza haundia eman zien lehenengo partiduko jokoak, baina horietan ere ez zuten indar hori baliatzerik izan; larunbatean 21-33 galdu zuen Hernanik Ereintzaren kontra, eta igandean 41-23 Urdaibairen aurka.
Jubenilek ere igoera fasea jokatuko dute
Denboraldi bikaina osatzen ari dira Hernaniko taldeak. Gizonezkoen jubenil taldeak asteburu honetan amaitu dute ligako lehenengo fasea, eta igoera jokatzeko sailkatu dira. Hirugarren postuan amaitu dute fasea, baina Bidasoak igotzeko aukerarik ez duenez, Hernanik jokatuko du.
Berdinketa, seniorrek
Bigarren mailako seniorrek 30-30 berdindu zuten, etxean, Donibane Kalaburtzaren kontra. Asteburu honetan faseko azken partidua jokatuko dute, Pulporen aurka.