Egun berezia izan zen atzokoa Rufino Rekalde hernaniarrarentzat. Aipatu izan du ez zaizkiola omenaldiak gehiegi gustatzen, baina aitortza ederra prestatu zioten Hernaniko esku pelotaren munduan egindako lana eskertzeko.
Bi pelota partidu jokatu zituzten Hernaniko kiroldegiko pelotalekuan. 300 lagunetik gora elkartu ziren harmailetan Jara-Alegria/Deskarga-Etxarri eta Mikel Goñi-Manterola/Salaberria-Altuna partiduak ikusteko. Kartela bikaina izan arren, bigarren planoan geratu ziren partiduak; Rufino izan baitzen arratsaldeko protagonista nagusia.
Iñaki Esnalek hartuko du Rekalderen lekukoa, eta berak jantzi zion omenaldiko txapela. CD Hernaniko pelotariek ere hartu zuten parte atzoko ospakizunean; jokalariek txalo zaparrada batekin egin zioten harrera Rekalderi, eta jokalari ohiekin argazkia atera zuen ondoren.
Bertsoak eta agurra ere eskaini zizkioten kiroldegian bertan. Rekaldek, hunkituta, eskerrak eman zizkien bertaratutako guztiei.
Omenaldiko argazki galeria ikusgai dago kronika.eus webgunean.