Pixkanaka iristen ari da Huntzaren 'Azkena balitz bezala' kontzertuaren eguna, eta une berezirako prestaketa lanetan buru belarri dabiltza taldekideak, tartean Aitor Huizi eta Uxue Amonarriz hernaniarrak. Dagoeneko argitaratu dute otsailaren 3an Bilboko Miribilla Arenan haiekin batera arituko diren artisten zerrenda.
Euskal Herriko kulturgile ugarik batu nahi izan dute Huntza taldearen agurrera, eta En Tol Sarmiento taldea, Nogen taldea edota Niko Etxart abeslaria izan dira kartelera gehitu diren azken artistak. Hogei gonbidatutik gora oholtzaratuko dira kontzertuan zehar, horien artean Alaitz eta Maider, Olatz Salvador edo Xabi Solano ereñotzuarra bezalako artista ospetsuak.
Kontzertu berezia izango da 'Azkena balitz bezala'; hala, 2014an hasitako ibilbidea borobilduko dute.
Sarreren %90a, salduta
Otsailaren 3an kontzertura joateko asmoa dutenek azkar ibili beharko dute. Izan ere, sarreren %90a saldu dutela jakinarazi dute Huntzako kideek. Azken sarrerak taldearen webgune ofizialean (huntza.eus) eta WeGow plataforman eskuratu daitezke.