Zabaldu dute dagoeneko Hernaniko Udal Euskaltegian matrikulatzeko epea. Urtarril osoan izango da izena emateko aukera, dagoeneko martxan dauden taldeetan sartzeko. Euskera ikasi nahi dutenek, maila hauek eskuratzeko aukera izango dute: A1, A2, B1, B2 eta C1. Klaseak aurrez aurrekoak izango dira. Hernaniko Udal Euskaltegiak eskainitako ordutegiak izango dira goizeko 09:15etatik 11:45etara, arratsaldeko 16:00etatik 18:30etara. eta ilunabarreko 18:30etatik 21:00etara.
Dirulaguntzak, Hernanin erroldatutakoei
Hernaniko Udal Euskaltegian ikasten duten hernaniar guztiek izango dute dirulaguntza jasotzeko aukera. Horretarako, aski da Hernanin erroldatua egotea. Bertan erroldatutako guztiek jasoko dute matrikularen %70a uztailean, eta langabetu, ikasle, erretiratu eta dibertsitate funtzionala duten herritarrentzako laguntza %90ekoa da.
Hainbat bide eskaintzen ditu euskaltegiak, harremanetarako: telefonoz, 943 33 18 96 zenbakira deituta; emailez, euskaltegi@hernani.eus helbidera idatzita, eta presentzialki, Karobieta 63ra bertaratuta.