Egun haundia izan zen atzokoa Galarreta frontoian. Binakako Txapelketako finalek ikusmin haundia sortu zuten zaleen artean, eta 1.550 pertsona elkartu ziren bertan lehenengo mailako eta bigarren mailako finalak ikusteko.
Maila nagusian Urrizak eta Azpirozek lortu zuten txapela, Ansa II.ari eta Martirenari 2-0 irabazita. Oso berdindua izan zen partidua, eta horixe erakusten du jokatutako bi setetako markagailuak; 13-15 eta 14-15.
Partidua detaile txikietan erabaki zen. Oso joko gogorrak izan ziren, hasierako tantoetan batez ere, eta arriskatzeko beharrarekin iritsi ziren set amaieretara. Aurrelariei dagokienez, Ansak Urrizak baino tanto gehiago egitea lortu zuen (15 Ansak eta 14 Urrizak), baina galdutako gehiago ere izan zituen urnietarrak. Atzeko koadroetan, sekulako partidua osatu zuten Azpirozek eta Martirenak.
Hernanin geratu zen bigarren mailako txapela
Bigarren mailako partidua ere oso gogorra eta luzea izan zen. Goikoetxea V eta Aiestaran VI hernaniarra izan ziren garaileak, Irazuri eta Apezetxea goizuetarrari 2-1 irabazita.
Lau erremontariak bikain sartu ziren partidura, eta hasieratik ikusi zen finala ez zela alde haundiengatik erabakiko. Bilakaera ezberdina izan zuten lehenengo bi setek, baina berdinketarekin iritsi ziren azken tantoetara. Lehenengoan gorrien alde erori zen balantza, eta urdinek berdintzea lortu zuten bigarrenean.
Set erabakigarrian Goikoetxeak eta Aiestaranek hartu zuten jokoaren ardura, baina Irazuk eta Apezetxeak ez zieten erraz joaten utzi. 7-7 berdinduta iritsi ziren azken tantora, eta, azkenean, gorriek eskuratu zuten zortzigarrena. Emozio biziko jardunaldia izan zen Galarretan.