Gaur arratsaldean Wukroren aldeko San Silbestreak hartuko ditu Hernaniko kaleak. 17:30etan abiatuko da lasterketa nagusia, eta 4 kilometroko ibilbidea osatu beharko dute korrikalariek.
Ibilbidea ohikoa izango da: Gudarien plazatik Lizeaga auzora abiatuko dira parte hartzaileak; auzoari buelta eman eta Atzieta kalean barrena, Zinkoeneatik pasata, Sagastialderaino jaitsi beharko dute; beheranzko atala osatu ondoren, itzuli egin beharko dute gora, hori kiroldegi ingurutik egingo dute, ondoren Latxunbetik pasa eta Urbieta kaletik erdigunera itzultzeko; Plaza Berritik kaxkoan sartu eta Kale Nagusia azkarren igotzen duenak irabaziko du.
Gaur gaurkoz, Peru Arregi hernaniarrak du marka onena (11:36), eta, lasterketa irabazteaz gain, marka hobetzea izango da korrikalari azkarrenen helburua.
Dortsal bilketa eta izen ematea, 15:30etatik aurrera
Parte hartzaileek gaur hartu beharko dituzte lasterketarako dortsalak, udaletxeko arkupeetan. Arratsaldeko 15:30etatik 17:00etara izango dute hartzeko aukera. Erabakia berandu hartu dutenek ere izena emateko aukera izango dute bertan.
Haurren lasterketekin hasiko da festa
Lasterketa nagusiaren aurretik haurren txanda izango da. 16:50etan txikienen lasterketa hasiko da, 8 urtera arteko haurrena. Ondoren, 17:00etan, 8-11 urte bitartekoek hartuko dute parte.