Ostiraleroko zitari eutsiz, gaur egingo dute urteko azken ostiraleko kontzentrazioa, Hernaniko preso eta iheslarien senideek deituta. Ohikoa baino ordu erdi beranduago izango da, arratsaldeko 19:30etan, Plazan elkartuta. Ordu erdi atzeratu dute, 19:00etan izango den Lukas Agirreren oroimen ekitaldia tarteko.
«Egun berezi hauetan, gure etxeko hutsunea nabariagoa da, eta ageriago geratzen da ez duela inolako zentzurik espetxe politika honek. Preso diren gure senideen eskubideak aldarrikatzen jarraitu beharrean aurkitzen gara, salbuespenezko espetxe politikak indarrean jarraitzen duen bitartean. Preso guztiei espetxe araudi arrunta aplikatuko baliete, gehienek kalean egon beharko lukete», aldarrikatu dute. Herritarrei deia luzatu diete, haiekin batera kalera ateratzeko.