Garaipenarekin amaitu zuten 2023a Hernaniko Boleibol Taldeko mutil jubenilek. Bera Bera taldearen aurka jokatu zuten kiroldegian, eta nagusitasunez irabaztea lortu zuten: 3-1.
Partiduko lehenengo jokoak bereziki berdinduak izan ziren. Bi taldeak elkarri neurria hartzen saiatu ziren, eta Bera Berak gehitu zuen lehenengo puntua, 23-25 irabazita. Hortik aurrera, ordea, guztiz aldatu zen partidua. Hernanik erritmoa bizitu zuen bigarren jokoan, eta 25-11 irabazita partidua berdintzea lortu zuen.
Hirugarren jokoan ere Hernanik izan zuen kontrola, nahiz eta emaitza estuagoa izan (25-22). Partidua erabakitzeko jokoan, laugarrenean, Hernanik berriro erakutsi zuen maila hobea zuela, eta ez zion aukerarik eman Bera Berari. 25-10 irabazita amaitu zen partidua.
Urtea garaipenarekin eta pozik amaitu zuten Hernaniko mutil jubenilek, eta urtarrilaren 13an itzuliko dira ligako partiduetara.