Igande honetan iritsiko dira Urumea bailarara, opari eta guzti, Olentzero eta Mari Domingi. Gau magikoaren aurretik, herrietako kaleetan zehar ibiliko dira, gaztetxoenekin une goxoak pasatzeko prest. Astigarragara iritsiko dira lehenik; Santiagomenditik jaitsi eta Foru plazan abesten arituko dira 11:30etan. Ondoren, herriko kaleetan zehar kalejira egingo dute.
Astigarraga atzean utzita, arratsaldean iritsiko dira Hernanira. Zinkoeneara 17:00etan iristea da haien aurreikuspena, Kaxkoan barrena kalejiran ibiltzeko. Gainera, arratsaldeko 18:00etan, gutunak emateko aukera izango da Gabriel Zelaia plazan.