Santo Tomas eguneko ospakizuna aprobetxatuta, omenaldi hunkigarria egin zien atzo Portuko Auzo Elkarteak 80 urtetik gorako bizilagunei.
Xumea bezain polita izan zen ekitaldia; jende ugari bildu zen Ibarrolaburu plazan, eta pozarren hartu zuten auzoaren esker ona omendutako pertsonek.
Agurra dantzatu ondoren, bakoitzarekin hitz egiteko tartea hartu zuten antolatzaileek, eta bertso bat prestatu zuten urte luzetan egindako lana eskertzeko:
Hainbeste urtez egin duzue
hain bide eskuzabala
Auzolanean eraikitzea
ez da meritu makala
Zuei eskerrak gu hemen gaude
jarraituz zuen itzala
Auzotar denok desio dugu
arrainak ura bezala
Zuen bideak Portu auzoan
luzaro jarrai dezala