Santo Tomas eguna ospatzeko ekitaldi sorta zabala izango da bailaran, asteburuan. Hernaniarrak izango dira lehenak jan-edana eskaintzen, errugbi elkarteak postua jarriko baitu, gaur, Kale Nagusian duen dendaren ondoan, goizeko 10:00etatik eguerdiko 15:00ak arte. Hernaniko San Joan Konpartsak ere pintxoak, bokadiloak eta taloak izango ditu salgai Plaza Berrin, 11:00etatik 14:30ak bitarte, eta arratsaldean Patxi eta Konpainia erromeri taldeaz gozatzeko aukera izango da, 18:00etatik 21:00ak arte. Eguraldi txarra egiten badu, erromeria Atsegindegira lekualdatuko da.
Astigarragan, frontoian eta Foru Plazan izango da festa, Herri Eskolak antolatuta. Txalapartak emango dio hasiera jaiari, eta segidan ikasleek postuak jarriko dituzte. 11:30etan dantza jaialdia eta bokata banaketa izango da, eta ordu erdi geroago txerritxoa eta bi saski zozkatuko dira. Erromeriarik ere ez da faltako herrian, 12:15etan trikitixa eta pandero soinuek alaituko dituzte kaleak, eta goiz osoan zehar, erakusketak eta tailerrak izango dira: txorimaloak eta bertako barazkiak izango dira ikusgai erakusketetan, eta tailerrei dagokionez, zapiak nola jantzi eta gabonetako zuhaitzak apaintzeko apaingarriak egiteko aukera izango da. Jaiari eguerdiko 13:00etan emango zaio amaiera.
Bihar ere festaz gozatzeko parada
Portuko eta Lizeagako auzo elkarteek bihar ospatuko dute Santo Tomas eguna. Portun 12:00etan izango da txistorrada, Ibarrolaburu Plazan, eta ondoren auzo elkartearen Gabonetako saskia zozkatuko da. Lizeagari dagokionez, txistorrada 12:30etatik aurrera eskainiko da, Auzo Plazan edo Urumea ikastolan, eta 13:00etan, berriz, lau saski zozkatuko dira Gibelaldeko bazkideen artean. Bazkidetza berretsi edota bazkide berriak egiteko 2024ko kanpaina txistorra-postuan bertan izango da. Gabonetako erakusketa ere ikusgai egongo da auzotarrek utzitako material birziklatuekin: gaur izango da inaugurazioa, arratsaldeko 17:00etan.
SANTO TOMAS EGITARAUA HERNANI GAUR 11:00-14:30 Txistorrada - Hernaniko San Joan Konpartsak. Plaza Berrin 18:00-21:00 Erromeria - Hernaniko San Joan Konpartsak. Plaza Berrin BIHAR 12:00 Txistorrada - Portuko auzo elkarteak. Ibarrolaburu Plazan 13:00 Saski zozketa - Gibelalde Lizeagako Auzo Elkartea. Auzo Plazan edo Urumea Ikastolan ASTIGARRAGA GAUR Frontoian eta Foru Plazan, Astigarragako Herri Eskolak antolatuta 10:00 Jaiaren irekiera txalapartarekin, eta ikasleen postuak 10:30 Bokata banaketa HH2-LH2 11:30 Dantza jaialdia eta bokata banaketa LH3-LH6 12:00 Zozketa 12:15 Erromeria 13:00 Festaren amaiera |