Gabonei begira ekintza ezberdinak antolatu dituzte Pakita Studion. Atzo ipuin kontaketa izan zen, eta gaur, Ania Sáenz de Buruagaren erakusketaren irekiera ekitaldia izango da 18:00etatik aurrera. Gaurtik 2024ko urtarrilaren 19ra arte egongo dira Aniaren lanak estudioko paretetan zintzilik.
Erakusketa Joseba Sarrionandiaren olerkian inspiratuta dago. «Suposatzen da, bizitzan, korapilatzen gaituzten, edo geu korapilatzen garen, hariei/harremanei buruzkoa dela. Anbinbalentzia eta gatazka sortzen diguten harremanak, mina egiten digutenak, ondo egiten digutenak, behar ditugunak… Barruan, sakon-sakon, eta askotan, ulertzen ez ditugun, edo nik, behintzat, ulertu ez ditudan sentimenduak/harremanak saiatzen naiz irudikatzen», dio Aniak.
Ania izango da estudioan erakusketaren irekierarako, eta jan-edana ez da faltako gaur arratsaldean.